چیلله گلیر ..
چیلله گلیر قار پیز گلیر نار گلیر
یولداشیلان گؤروشمگه یار گلیر
قاپ باجانی شاختا کولک آلیب دیر
آیاقلاری اوشوتمگه قار گلیر
خونلارین اوسته بزه نیب خونچالار
دلبر اولان مجلسه دلدار گلیر
خیردا اوشاقلار سئوینیللر بوگون
قیزلار اوچون قیرمیزی پالتار گلیر
سؤزلری یورقون سینه سیندن جوشور
آشیغیلان یول بیر اولوب تار گلیر
یاخچی قوهوملار ییغیشیب بیر یئره
هرنه گلیر سفره میزه وار گلیر !
آغزی شیرین چای ایچیلیر کور سوده
سماورین آغلاماغی زار گلیر !
یاخچی بو عادت آتالاردان قالیب
یوخسا بیزه شاد یاشاماق عار گلیر !
نئنه مه لی بیر گئجه ده خوش اولاق
دوزدو بیزه ایندی حیات دار گلیر !
آمما گرک ایشیقلاری گؤزلورک
بوگون صاباح باهار گلیر بار گلیر !
تقی نژاد ((یاغیش))
سی ام آذرماه ۱۴۰۲