عجیب زامان اولوب بیزیم زمانه.
اینسانین حالینا حئیوان آغلاییر.
اینسان درد الیندن گلیب فغانه.
تاپیلمیر دردینه درمان آغلاییر.
باخیشلار اولوبدور قیش کیمین سویوق.
اینسانلار ائله ییر ثروته قوللوق.
بعضن بیر ایش گءورور اشرف مخلوق.
گیلایه ائله ییب شیطان آغلاییر.
اینسان پولدان اءوترو نه دئسون گءورور.
اوغلان قاش آلدیریب ساچلارین هءورور.
حکیم جللاد اولوب آدام اءولدورور.
قبریده بیچاره لوقمان آغلاییر.
کیشی دول آختاریر آروادی اویناش.
قضاوت ائله ییر اوغرییا اوباش.
خیانت ائله ییر قارداشا قارداش.
قیرت ماتم دوتوب ویجدان آغلاییر.
آلچاق آداملارین اوجالیب باشی.
زیارتگاه اولوب جهالت داشی.
اءوپوب چیرکلی داشی توکور گءوز یاشی.
تاپداییر باشینا نادان آغلاییر.
گوهرچی بیلمه ییر گوهر قیمتین.
قویوبلار ساتیشا اینسان عیصمتین.
آشیقلار ساخلامیر سازین حورمتین.
میضراب ناله ائدیر کامان آغلاییر.
حاکیملر اونودوب میللتین قمین.
یاغیلار آشکارا وئریبلار کمین.
هر کیم اءوز ایشینین تاپیبدیر چمین.
چاققال توتک چالیر آسلان آغلاییر.
سالیبلار زیندانا حق سئونلری.
شاللاقلار آلتیندا سویولور دری.
حقیقت تاپدانیب گئده ندن بری.
دوران گولومسه ییر زامان آغلاییر.
آتا اءوز بالاسین چکدیریر دارا.
کءومور دئییر قارا،آی اوزو قارا.
آنالار دردینه تاپیلمیر چارا.
باجیلار دردینه یانان آغلاییر.
زمانه الیندن گلمیشم جانا.
باخیرام اینسانا من یانا یانا.
تانریدا رحم ائتمیر یازیق اینسانا.
هارای آی اینسانلار اینسان آغلاییر.
آیریلماز دوعا لان آچیلماز دوگون.
دوگونلر چوخلاشار قالسا گون به گون.
شاعیر نظمه چکیر باخیب گءوردوگون.
قلم سیزیلداییر یازان آغلاییر.
آیریلماز