▫️آپار منی بو اومیدین دالینجا!
او قارانقوش یوواسی کی سویویوب،
او گؤلده کی غریب دورنا اویویوب،
کؤنلوم سنین اومیدینه چوخ اویوب،
آپار منی بو اومیدین دالینجا!
من قوزئیین «گون چیخ-گون چیخ!» ناله‌سی،
چاتماز منه گونشین بیر هاله‌سی.
ائی گونئیین قاناد آچان لاله‌سی،
آپار منی بو اومیدین دالینجا!
سنین سئوگی جیغیرلارین یول آچان،
یئتیشه‌رم او یوللارا من هاچان؟
آغاجیمدا سونونجو یارپاغاجان،
آپار منی بو اومیدین دالینجا!
کور اوجاغیم یانیب کوله دؤنونجه،
لاپ سونونجو ایشارتیسی سؤنونجه،
سن گئت منیم طالعیمین اؤنونجه،
آپار منی بو اومیدین دالینجا!
اوندا جورأت، بوندا موروَت اولمادی،
سیتم اولدو بو، محبّت اولمادی.
یانینجا کی گئتمک قیسمت اولمادی،
آپار منی بو اومیدین دالینجا!
سن ذیروه‌ده، من دره‌نین دیبینده،
من پاییزدا، سن بیر باهار تبینده.
بیر آغ یئلکن کولک‌لنیر گمینده،
آپار منی بو اومیدین دالینجا!...
#موسی_یعقوب
#شعر_اوجاغی
@SheirOcagi