جهاندا هر موصیبته دوزر حسینین عاشیقی
الین بو فانی دونیادان اوزر حسینین عاشیقی
حسینچی شخص هچ کسه دوروب خیانت ائیلمز
باشین داش اوسته کسسلر یقین شقاوت ائیلمز
بیر عده ساده میللته گلیب جنایت ائیلمز
جهاندا ظولم و ذیللته حسینچی همت ائیلمز
حقیقت الهی نی بیلر حسینین عاشیقی
ریاکار اولسا هر بشر یولوندا ائیله یر خطا
پئیمبر امتی مگر دگیلدی قوم اشقیا
مگر نمازی قیلماییب یزید و شمر بی حیا
مگر یالانچی مسلمین حسینه ائتمه دی خطا
ریا و فتنه دن ائدر حذر حسینین عاشیقی
بوگون ولی عصریمیز بو حال زاره آغلاییر
بیزیم بو پیس عمل لره آماندی سینه داغلاییر
حسین قاراسین ایندی ده عزاده باشه باغلاییر
امام اگر چاغرسا تئز گئدر حسینین عاشیقی
بیر عده احتکار ائدیر مسلمانین نیازینی
اذاندا مسجده گئدیب قیلیر ولی نمازینی
جماعت ایچره ائیله ییر خدایه حمد و رازینی
صغیره تاپسا ال یقین اوزر اونون بوغازینی
جهاندا محتکر اولار مگر حسینین عاشیقی؟؟
بیر عده نوحه خوان دینین پول اوسته برقرار ائدیر
اولوبدو شاعیر عیترته ولیک کسب و کار ائدیر
بو شخص اشقیا کیمی حسینی داغدار ائدیر
او شاعره اولوم فدا اوزون فدای یار ائدیر
بیر آندا عومرون ائیله مز هدر حسینین عاشیقی
حسینچی شاعیر عرشه جان ، اوجالداراوز وقارینی
جهانی وئرسه لر اونا دئییشمز اوز نگارینی
ولی عصریدن آلار همیشه اعتبارینی
اَیَر باشین یئره اگر اوزونده گورسه بارینی
وجودی پاکین عشقیله بَزَر حسینین عاشیقی