حرام ییئن آدامین اولو می
بیرنفر وارلی آدام بیر گئجه ایستردی اوله
یاخین ایدی یازیغین قلبینی غم تیری بوله
باشینی سیلکه لیوب آروادا سئولردی بئله
اس مس ائللره گوندر داخی آرواد اولورم
یئریمی قبله یه دوندر داخی آرواد اولورم
گزمه لر اوخشادیری معتادا بسکه آریغام
یئییب ایچمک دن اوزوندا بیلیسن کی قوروغام
منی بیر چوپچه گورست ائله بیل کی قاریغام
داماغیمدان پوله سین قارنیما سالسین بیر الک
بیلیرم قازمانی گوتدی ائویمی ییخدی فلک
یئدگیم ایچدیگیم ایندی ایکی فنجان چایدی
اونیلان قارنیما بیر باخ نئجه گور های هایدی
آغزیمین مزه سی بیر باش ائله بیل عزوایدی
گاهی تبدن یانیرام گاهی سویوخ تردی گلیر
قالخیرام گه ایاقا یکسره باشیم گیجه لیر
بیرده قوزا باشیمی قوی بونو دقتله یازیم
من اولندن سوراوئر قوی اوخسون میرزه کاظیم
اللی بئش ایلدی منیم فوته گئد بدور نمازیم
بیلرم چرخ زمانه سنی اوخشاتدی دولا
وئره سن هشته یکوندان نمازی میرزا قیلا
نه منه یول وئره ر عیسی نه ده موسای کلیم
دینیم اسلامدی زبس فعلده بد دیر عملیم
داخی ایندی گئدورم قبر ائوینه بوشدی الیم
خیرعمل یوخدی اوقیل کورپوده دوتسون قولمو
بیلیرم مالک دوزخ گودور ایندی یولومو
اودوزوب اوتمادی دونیانین ایشی مثل قمار
او آدام برد ائله دی قبرینه گوندردی زومار
اودوزان کوردی داخی کیم یاشی کور گوزدن اومار
آپاران عدنیده هئی نعمت الوان یئیه جک
اودوزان قعر جهنم ده الین چئینیه جک
ائله کی دوشدو منیم میز ریاست الیمه
باغلادیم صبح ومسا خنجر شمری بئلیمه ا
هر نه بیلدیم ائله دیم گئتمه دی فیکریم اولومه
منی بو رشوه پولیلن ائله مست ائیله دیلر
اوندا آچدیم گوزومو بازنشست ائیله دیلر
بولادیم ساققالیمی گونده یالانین توزونا
مال دونیانی ییغیب باخمادیم هئچ آغ بوزونا
بوش الیم بند اولاجاق وارثین آخر قوزونا
قیز مینیب ماکسمانی شاد وخرامان گزه جک
اوزگه چیگنینده منیم کله می تابوت ازه جک
ائله کی وئردیله غسال خانا دامردا شورا
آدمی فوری یازار دفتر اهل قوبورا
ناز پروده اوشاقلار منی قویلارلا گورا
صاحب حق تاپیلوب تئز یاخار اوردا منی
وورموشام خالقی وورار لار بولارام آغ کفنی
اوقدرظلمیله خلقین اورگین داغلا مشام
چکمیشم حق دانیشانلار قاپوسین باغلا مشام
یمیشم مال یتیمی اوتوروب آغلا میشام
آدمی حاجی قویوب مروه صفا باشلامشام
بیلمیرم مککه ده شیطانی نجور داشلامیشام
اصل شیطان اودیکی بیر بیره دنیانی قاتار
اوزی عنباردا ییئر خلقه یالان وعده ساتار
باخ بشرده کلگه شیطانا شیطان داش آتار
هرکسین مال حرامیله دولوب قارنی کوپر
گونده اوچ یول گلر ایبلیس اونون آلنیندان اوپر
دیرآی تخم حرام سن منه شیرین جانیدون
ننه قارنیندا بیلردیم نجه بی وجدانیدون
اورداکی من یوخودیم آخ سن اوزون شیطانیدون
باشینا یورقانی چک قویما مسلما اویانا
فرصتی سال الیوه چولقا بو دنیانی قانا
الغرض غفلت ایچنده باشاچیخدیم ورمی
اورجی قیشدا یدیم یایدا گن اتدیم درمی
هرنه واعظ دیدی وردیم قاباقا پیسرمی
بیلمدیم یاخشی اویود پیس تو خانار آنامازا
یوخسا هر صبحین اذانیندن دورادیم نمازا
بیر بله عمر ایلدیم آننامادیم توبه ندی
بیلمدیم یاخشیا تبدیل ایلیر توبه بدی
محبس جاهیلتدا قالوب اولدیم ابدی
بیر زمان گوزگیه باخدیم گلیب آغ توک قاشیما
ایکی الیک گجه گوندوز ویریرام هی باشیما
و ای او شخصین حالینا مالی حرامنان قازانا
اولسه خرج ائلیرر روضا خوانا گور قازانا
باساجاق مالک دوزخ اونی قینر قازانا
بش گونون لذزتینه دائمی اوتدا یاناجاق
ویراجاخ لار باشینا اوز آدین اوردا دانجاخ
دای نورالهی قوتار دردیمی چوخ چالخالاما
من یدیم مال حرامی دیبینی سن یالاما
نفسی وی بوشلاسون ایمانوی تاپیشیر خالاما
دوزدی بیر چاره یولی یوخدی قضاو غدره
نفس عماردی انسانی سالان دردسره
سلیمان نورالهی .....