معرفی ونمونه آثار شاعران
میخانه یه
گشت ائیله دیم رقص ائیله دیم میخانه دن میخانه یه
توکدوم شراب لاله گون پیمانه دن پیمانه یه
عشق عذار مهوشی یاندیردی بو محنت کشی
میراث ایمیش عشق آتشی پروانه دن پروانه یه
ساقی تز اول کئچدی گئجه فردا غمی گلمز وئجه
آل کاسه نی وئر کوزه نی مستانه دن مستانه یه
قربان او زلف تارووه یوخ بئیله سنگین سلسله
هی آچیلیر هی باغلانیر دیوانه دن دیوانه یه
قا ناغلاسن آلوده لر شاد اویناسین آسوده لر
مال جهان بالله قالیر بیگانه دن بیگانه یه
گلشن وئریلدی بولبوله قونسون او گول ده بو گوله
قسمت ده بایغولار ائوی ویرانه دن ویرانه یه
واعظ لیگین ترک ائتمه دین بیر معرفت درک ائتمه دین
وئردین شکوهی گوش عجب افسانه دن افسانه یه
میرزامهدی شکوهی مراغه ای