ظارافات ائیله‌مه قوربانین اولوم
بو دونیا ظارافات مئیدانی دئییل
قاریشقا یئریشی راحات یئریش دی
بو مئیدان کؤهله‌ن آت مئیدانی دئییل
اوینادیب چوخ شئیی اومار اویناما
ائتسه ده روحونو خومار، اوْیناما
سن بو قومار بازلا قومار اوْیناما
ظارافات گلمه‌سین سنه بو دونیا
چوخ یئرده قبرینی قازان اولاجاق
باشین قایناماغدان قازان اولاجاق
سانما یاشاماغین آسان اولاجاق
ظارافات گلمه‌سین سنه بو دونیا
یوخسوللوق یوخسولون باغرینا اوخدو
معده‌سی توخلارین مزه‌سی توخدو
فیل وار قاریشقاجا حؤرمه‌تی یوخدو
ظارافات گلمه‌سین سنه بو دونیا