.

زارافات ائله مه قوربانین اولوم ،
بو دونیا زارافات مئیدانی دئییل.
قاریشقا یئریشی راحات یئریشدی،
بو دونیا کؤهلن ، آت مئیدانی دئییل.

اوینادیب چوخ شئیی اومار اویناما ،
ائتسه ده روحونو خومار اویناما ،
سن بو قوماربازلا ، قومار اویناما،
زارافات گلمه سین سنه بو دونیا.

چوخ یئرده قبرینی قازان اولاجاق،
باشین قایناماقدان قازان اولاجاق،
سانما یاشاماغین آسان اولاجاق،
زارافات گلمه سین سنه بو دونیا .

یوخسوللوق یوخسولون باغرینا اوخدو ،
معده سی توخلارین مزه سی توخدو،
فیل وار قاریشقاجا حؤرمتی یوخدو،
زارافات گلمه سین سنه بو دونیا .

چوخ یئرده مکیرلی اویون اولاجاق ،
شیر - پلنگ چئوریلیب قویون اولاجاق ،
هله نئچه دفعه تویون اولاجاق ،
زارافات گلمه سین سنه بو دونیا .

عؤمرونو قار یئییب ، قیش آپاراجاق،
خیرماندان دَنینی قوش آپاراجاق ،
دونیادان اَلینی بوش آپاراجاق ،
زارافات گلمه سین سنه بو دونیا .

غیبتین قویوسو ، حیله نین تورو ،
سنه دیری - دیری گؤستَرَر قورو ،
باشین وار باشینی باشسیزدان قورو،
زارافات گلمه سین سنه بو دونیا .

شیطان دورا - دورا شئرله نر  دَوه ،
قاطیر قویروغوندا هئرله نر دَوه ،
کینین دن ییخیلار ، تیرره نر  دَوه ،
زارافات گلمه سین سنه بو دونیا .

موغامی آغلاماق والی آغلاماق ،
والیندا قیریلمیش حالی آغلاماق ،
فیشدیریق چالماغین دالی آغلاماق،
زارافات گلمه سین سنه بو دونیا .

یاسین یئددیسی وار ، اوچو قیرخی وار،
قبیر یئرینین ده حاققی - نیرخی وار ،
اؤلومدن سونرا دا هله قورخو وار ،
زارافات گلمه سین سنه بو دونیا .

زلیمخان حسرتین یئددی قات اولار ،
حیاتین قان دولو بیر حیات اولار ،
زارافات ائله سن شاهین مات اولار ،
زارافات گلمه سین سنه بو دونیا .

#زلیمخان یعقوب

       💫🍥🎁 @ZElKH 🎁🍥💫