‍ بو دونیانین، گؤر، نه بویدا دردی وار!


چالیش لاییقلی اول بیر تمیز آدا،
تمیز اول همیشه، دوشرسن یادا!
اونسوز یاشادیغیم قوجا دونیادا،
هر بیر ائلین نامردی وار، مردی وار،
بو دونیانین، گؤر، نه بویدا دردی وار!

قوجا دونیا قورخولو بیر تاماشا،
چوخوموزو سالیب قورخو، تلاشا.
ظالیملره «چهار» قوشا، «شش» قوشا،
یئتیملره «دوبول» وئرن «نرد»ی وار،
بو دونیانین، گؤر، نه بویدا دردی وار!

عؤمور گئدیر، گونلریمی سای، اوغول!
دؤرد طرفیم دریا، دنیز، چای، اوغول!
بیر کیشیدن بورج ائله‌دین، آی اوغول!
اونوتما کی قایتاردی وار، وئردی وار،
بو دونیانین، گؤر، نه بویدا دردی وار!

کیم اویناییر اونونلا بو اویونو،
اودو قوران هامیمیزین تویونو.
یال-یاماجا دولدوروبدو قویونو،
قیرماغا دا چاققالی وار، قوردو وار،
بو دونیانین، گؤر، نه بویدا دردی وار!

آغیر یولدو کئچه‌جه‌ییم باخ بو یول،
فرقی یوخدو چوبان اول، یا ناظیر اول.
ائیواز قارداش، اؤلوم گلیر، حاضیر اول!
یارانمیسان، بیر گئجه ده اؤلدو وار،
بو دونیانین، گؤر، نه بویدا دردی وار!...

#یتیم_ائیواز

@qanadli_duyqular