خوش گلیبسن عالمه جانان، سلام اولسون سنه
نوشته شده در تاریخ چهارشنبه سوم اسفند ۱۴۰۱ توسط قادر خانبابایی شاعر اهل بیت (ع)
خوش گلیبسن عالمه جانان، سلام اولسون سنه
سن کیمی انسانه جان قربان سلام اولسون سنه
ای ائدن اوز مقدمیله عرش و فرشی پر بها
سن کیمی انسان داخی خلق ائتمه ییب ائتمز خدا
لیک وار باشیندا ای مولا سنین چوخ ماجرا
ای اولان هر قلبه سن سلطان سلام اولسون سنه
جانی ای جانانینه قربان سلام اولسون سنه
سن قدم قویدون بو دنیا تاپدی فضل و عزتین
فخر ائدر عالم ،تاپیبدیر چون بوگون اوز شوکتین
کیم حسین چی اولسا عالمده تاپار اوز حورمتین
ای پوزولموش قلبه سن درمان سلام اولسون سنه
افتخار حضرت سبحان سلام اولسون سنه
سن گلنده یئرلره عزت وریلدی گویلره
احسن اولسون یاحسین جدین اولان پیغمبره
افتخار اولدون آنان زهرا بابان اول حیدره
ای وجودی معدن عرفان سلام اولسون سنه
ائیله دی الله سنی احسان سلام اولسون سنه
معنی عرفانی عاشوراده معنا ایله دین
نصف بیر گونده حسین، اسلامی احیا ایله دین
سن الستین عهدینی معناده امضا ایله دین
ظلمی ای ویران ائدن انسان سلام اولسون سنه
کل عالم صبرینه حیران سلام اولسون سنه
ای حسینچی سعی ائله دنیاده طغیان ایله مه
ظالمی شاد ائتمگه مظلومه عصیان ائله مه
عزتی چوخدور بهاسی نفسه قربان ائله مه
قوی دئسین اول سرور خوبان سلام اولسون سنه
ای نماد مظهر خوبان سلام اولسون سنه
کربلایی قادر خانبابایی