ساقی گوتوروب کوزه نی مجلسده دولاندی
یاتمیشدی جماعت دیسن بیردن اویاندی
گوز تکیلیب ساقیه یالقیز سوت امر تک
ور ور سسی باشلاندی هیاهواوجالاندی
او باده نی دولدورماغا پیمانهء بیر بیر
تئز تئز ایچیلیب کوزه ده کی باده جالاندی
فریاد ایلدیم ساقیه رحم ایله قوتارما
بیر عومریدی من ایچمَمیشم باده آماندی
قی قاجی باخیب حال پریشانییمی گوردو
یاندی اوره گی گلدی مقابلده دایاندی
قالخیزدی کوزه نی یوخاری ساغری سوزدو
بیر جورعه وریب سویلدی لاپ تکده قالاندی
بیر عمر دوزنن سورا می جامین آلاندا
ال تیتردی پیمانه چونوب باده جالاندی
باخدم جالانان بادیه، بیرده گویه باخدم
حسرتله ددم دوغروسی قیسمتده یالاندی
قسمت،منیم عمرومده منه اولمادی قسمت
من آتدیخجا ، اوجالدیخجا او منن آرالاندی
هر کوزه نی گوتدوم الیمه قیرپی قیرلدی
هر چشمیه گدیم سو ایچم چشمه بولاندی
ساقی ددی بسدور بو قدر تامبورا چالما
قسمت یازیسی انسانی خیالاته سالاندی
دونیانی که گِننن بو گوزلیخده گوریسن
ظاهریده گوزل، باطنی بیر کهنه دالاندی
هرکس بو دالاندا قمار اوینار که آپارسین
بیلمیر اوشاغ اویناغی دئییر بو پاپالاندی
اونلار که اونون چوخدو واری یوکدو چاتیبلر
آلتیندا یوکون گورسنن اِشکدی پالاندی
ساقی گوتاریب سوزلرین آخیرده بیوردو
دونیاده فقط یاخچیلیغ انسانه قالاندی
شاعر حمید سخامهر