((سیندیرماق اولماز))

سینیق اوُره کلَری سیندیرماق اولماز
اُوقلُو اوُلَئه ن آنایا نَه دئییم آخی
یانیقلی سینَه نی یاندیرماق اولماز
من یئتیم بالایا نَه دئییم آخی


هامییا خُوش گلدی تَهرانین سئسی
حایات دا خُوشلادی او دار قئفَسی
داغلاردان آزالدی قویُون دَستَه سی
قُوربانسیز مینایا نَه دئييم آخی


قیش گونُو داغلاری دُومان قار آلی
اُوزاقدان گوُزلَری باخان قارالی
اِئللَری اِئلینده ن سالان آرالی
بیر بئلَه یارایا نَه دئييم آخی


اِیللَریدی وَطئنده ن دُوشمُوشَم آرا
حئسرَت لَه باخیرام اوُجا داغلارا
باش قویُوب یاتاندا غَریب دیوارا
چالینان لایلایا نَه دئييم آخی


بو دونیا بیزلَره وئریبدی تالان
ظُولوُمُون اَلینده ن چئکیرُوخ آمان
اوُز آنا یُوردُومدا خارابا قالان
داغیلان بَنایا نَه دئييم آخی


(غمخوارام)شِعرلَریم دُوشُور دیللَره
گوز یاشیم آخلانیر دُونُور سئللَره
زامان مَنی حئسرت قُویُور اِئللَره
بو خاراب دونیایا نَه دئييم آخی

غمخوار

@turkimahni