بیر گۆن من اولماسام غریب سییرسن؟
او غملی گؤزلرین یاش تؤکرمی هئچ؟!
او من سیز دنیادان نه ایستییرسن؟
او من سیز گؤزلرین یول چکرمی هئچ؟
بیر کۆلکلی آخشام.....یاغیش گئجه سی
دوروب اوشویرسن سوبا دیبینده
اوندا قیریلاجاق قلبینین سسی
اوندا داریخاجاق دردین ایچینده
بیر آنلیق گؤزونو تیکیب گۆزگویه
سیغالسیز ساچینی قوخلایاجاقسان
تازا بیر خاطره تاپاسان دئیه
کهنه ال چانتانی یوخلایاجاقسان
ائو سنی اوداجاق اژدها کیمی
اؤزونو مین دفه قینایاجاقسان
سویوق اتاغیندا، بوش کاها کیمی-
قالان گۆنلرینی سانایاجاقسان
دوغمالار سنین‌له بیر اولمایاجاق
ائله اومودلرین قیراجاق سنی
دردینی دئمه‌یه یئر اولمایاجاق
قبرستان یوللاری یوراجاق سنی
بیر گۆن من اولماسام...دییشه جکسن،
دردین یاندیراجاق سنی اود کیمی
بۆتون دنیا ایله دؤیوشه‌جکسن
تنها قالاجاقسان سون اومود کیمی
مزاریم اۆستونده گۆللر سولاجاق
سارماشیق ساراجاق باش داشیمی دا
گۆنده نئچه کره گؤزون دولاجاق
سیلن اولمایاجاق گؤز یاشینی دا
اوُچوق پنجره لی جان قفسیمی
یئددی قیفیل ایله باغلایاجاغام
اووجوما اۆفوروب سون نفسیمی
سنین چون صاباحا ساخلایاجاغام.....
#نوصرت_کسمنلی
@qanadli_duyqular