اؤیرتمه اؤزونه، اؤیرتمه منی - موسی یعقوب
یولوموز هارداسا قیریلاجاقسا
ایتیره جگیکسه بیر-بیریمیزی
خاطره م یادیندا قالمایاجاقسا
بو ال لر منیمکی اولمایاجاقسا
بو تئل لر منیمکی اولمایاجاقسا
سن آللاه اؤزونه اؤیرتمه منی
هجران قوخوسویلا گؤینتمه منی
من بیر آز بوداقلی باهار کیمی ام
بیر آز دا ساده لؤوح اوشاق کیمی ام
بالا آناسینا قوووشان کیمی
لئیلک یوواسینا قوووشان کیمی
آری گول چیچگه اویوشان کیمی
ائه - من ده آداما تئز یوووشانام
سئوگی آتشینده تئز آلیشانام
آما کی سؤنمگیم چوخ چتین اولور
سئوگی دن دؤنمگیم چوخ چتین اولو
اؤیرتمه اؤزونه، اؤیرتمه منی
بلکه گؤزله میردیک بو خوش گؤروشو
یامان غریبه دیر دونیانین ایشی
هئچ واخت یول لاریندا دایانمادیغین
هئچ هنده ورینده دولانمادیغین
گلیر بیردن بیره نه شیرین اولور
عؤمرونون ایچینده عؤمور دوغولور
بو شیرینیم آجی اولاجاق ایسه
بو قسمت چیچگیم سولاجاق ایسه
اؤیرتمه اؤزونه، اؤیرتمه منی
کؤنلومده یئرین وار، قوپماز یئریندن
بیر اکیز لچگی هاچا بوداغی
آییرماق اولورسا بیری-بیریندن
منی ده آییرماق چتیندیر آخی
اؤیتمه اؤزونه، اؤیرتمه منی
یوخ بونا طاقتیم، یوخ بونا تابیم
الیمی الیندن اوزمک عذابیم
سونرا بو قسمته دؤزمک عذابیم
یوخسا دا کؤنلومون سینیق لاری وار
هجرانین کؤز باسمیش یانیق لاری وار
منیم دردلریمین آیاق لاری وار
هاردا اولسا گلیب تاپاجاق منی
یاخیب یاندیراجاق بو اوجاق منی
گل منی اؤزونه اؤیرتمه بئله
الیمی الینه اؤیرتمه بئله
گؤزومو گؤزونه اؤیرتمه بئله