🌷اولماز🌷

دلی کؤنول ، نه دیوانه گزیرسن
بی وفا دیلبردن سنه یار اولماز.
دوز چیخماز ایلقاری ، عهد و پیمانی،
هرجاییدا ناموس ، غیرت ، عار اولماز.

اوز وئرمه نادانا ، سیرر وئرمه پیسه ،
آخیر ، قلبین یا اینجییه ، یا کوسه
اوت بیتَر کوک اوسته ، اصلی نه ایسه
یووشان بَسله مک له ، چمنزار اولماز .

وفالییا اَمَک چَکسن ایتیرمز ،
بد اصیل ، نصیحت - اؤیود گؤتورمز
قاباق تاغی ، تر شاماما بیتیرمز ،
گؤی سؤیودده حئیوا اولماز ، نار اولماز

تکلیف اولونمامیش بیر یئره وارما ،
نر اولماز مئیداندا هر بیغی بورما
سئیراغوب آداما سن یاخین دورما
خائین چیخار ، اوندا دوز ایلقار اولماز.

"خسته قاسم" گونو کئچمیش قوجادی،
گلن بزیرگاندی ، گئدن خوجادی
سرو آغاجی هر آغاجدان اوجادی
اصلی قیتدی ، بوداغیندا بار اولماز .

🌷خسته قاسیم🌷