آذربايجان شرقي
شعر طنز استاد آرش آزاد به مناسبت روز پدر؛
کيشي‌سن، آنجاق‌کي…!؟
28 فروردين 1395 - 02:04:49 ب.ظ
خبرگزاري آريا- زنده ياد استاد حميد آرش آزاد نزديك40 سال سابقه فعاليت در عرصه مطبوعات آذربايجان شرقي را در كارنامه ي فعاليتي خود داشت .
به گزارش خبرنگار ما درتبريز ، وي اشعار بسياري به مناسبت هاي مختلف سروده که شعر زير نيز يکي از سروده هاي اين استاد مي باشد .
اوْلسا يوکسک مقامين، چوْخلودا ثروت، کيشي‌سن
قسمت اوْلسا سنه عالم‌ده سعادت، کيشي‌سن
آنا سؤيلرکي: «اگر آروادي مجبور ائده‌سن
ائله‌يه عؤمرو بوْيو من‌دن اطاعت، کيشي‌سن»
باجي‌نين فکري بودورکي، سن ائوينده قاديني
قوْياسان ايل‌لر ايله خوْش گونه حسرت، کيشي‌سن
قادينين‌دا نظرينده، آناني، هم باجي‌ني
ائتمه‌سن ائوده قوْناقليق‌لارا دعوت، کيشي‌سن
اوْ دئيه‌ر: «آغزينا چال هم آنانين، هم باجي‌نين
بولار ائتمه‌زسه بيزيم ايش‌ده دخالت، کيشي‌سن»
باجاناق بير آرابا گؤردو، تئز ايستر سيويچي
«پئژو» نو وئرسن اوْنا هرگون امانت، کيشي‌سن
قارداشين ايستيري تئز- تئز اوْنا ضامن اوْلاسان
ائله‌سن بوْرجلو دوشن گون‌ده ضمانت، کيشي‌سن
قايين، عسکرليگي وئرميش باشا، ايش‌سيز دوْلانير
سرمايا وئرسن، اوْدا ائتسه تجارت، کيشي‌سن
قوْنشونون اوْغلو، سنين اوْغلونو هئي تاپدالايير
دينمه‌ييب، گؤستره‌سن بوْللو نجابت، کيشي‌سن
تعظيم ايستير رئيسين گون‌ده اوْتوز- قيرخ دفعه
گون‌ده يوز يوْل ائده‌سن عرضِ ارادت، کيشي‌سن
قصابين- باققالين البته توقع‌لري وار
سوْرماسان‌کي: «نييه‌بس قالخيري قيمت؟» کيشي‌سن
دوْستلارين لُطفو سنه چوْخ‌دور، ارادت‌لري وار
شام- ناهاردا وئره‌سن ياغلي ضيافت، کيشي‌سن
ايل‌ده بير سئچگي اوْلور، مين‌لر آدام کانديدا
هامي‌سيندان ائله‌سن دوزگون حمايت، کيشي‌سن
کيم «سلام» سؤيله‌دي، وار حقّي سنين بوْينوندا
قوربان ائتسن اوْنا جان‌لا مالي راحت، کيشي‌سن
کيشي گؤردوم سني «آرش»! جانينا آند ايچيره‌م
سن اؤل ها…، چون‌کي وارين بوْللو حماقت، کيشي‌سن