غزلیم
حسین منزوی

آچ گؤزون قوی یوخودان گول‌لر اویانسین غزلیم!
آچ گؤزون قوی باخیشیندان گون اوتانسین غزلیم!

گؤره بیلمز گؤزه‌لیم، آی‌دا، اؤزوندن گؤزه‌لین
باخ آیا، قوی حسدیندن، پارالانسین غزلیم!

سن اولان یئرده گولوم! گول نه‌دی؟ دور گلشنی گز
قوی سنین باشیوا، پروانه دولانسین غزلیم!

چیخ چمن سیرینه، مدهوش ائله سروی، سمنی
قوی آدین عطر کیمی باغدا جالانسین غزلیم!

گون نه‌دی؟ آی نه‌دی؟ اولدوز نه‌دی؟ گؤیچک‌لر آدی
سن اولان یئرده گرک‌دیر قارالانسین غزلیم!

قالمیشام قاشیوی، کیپریک‌لریوی، گؤزلریوی
قلمیم هانسی‌نی وصف ائیلییه؟ هانسین؟ غزلیم!
سنی آغوشه چکنده اوره‌گیمدن دییه‌رم
اولا کاش دور زامان بوردا، دایانسین غزلیم!

یا دایانسین یا دا هر لحظه‌سی هر ثانیه‌سی
بیر ایل اولسون، ایلی بیر عؤمر اوزانسین، غزلیم!

سنی هر کیم دیله چالسا، گؤروم آغزی قوروسون
گؤروم آغزیندا، عؤمورکن دیلی یانسین غزلیم!
***
ائلیمین غم‌لری بس‌دیر منه، سن غم یئمه دای
قویما غم، غم‌لریمین اوسته قالانسین غزلیم!

آغلاما، غم یئمه، قوی گول‌لر آچیلسین، بالاجان!
ائله گول کی قوی آتان، غم‌لری دانسین، غزلیم!