اورییم یانیری یالقیزلیغیما
باخیرام حسرتله سونسوزلوغوما
سن لی ام،نه یازیم سنسیزلیغیما
یاز فصلی دئمیشدین آچاجاق گوللر
نه گول آچدی نه سس وئردی بولبوللر

سینیرام ایچیمدن ،سسی گلمیری
اوزومدن گولورم،اورک گولمورو
اینصافسیز سئوگیلیم بونو بیلمیری
آخاندا گؤزومدن قایغیلی سئللر
نه گول آچدی نه سس وئردی بولبوللر

منلیییمی مندن آلان گؤزلرین
قیسقانجی لا دئییر منه سؤزلرین
آنلایاندان سؤزون، یالان_ دوزلرین
سوسوب ،دانیشمیری دانیشقان دیللر
نه گول آچدی نه سس وئردی بولبوللر

سن منیم کؤنلومده آچان چیچگیم
باغلانیب دیر سنه، آرزیم دیلگیم
جانیمسان،قانیمسان، وورغون اورگیم
ساچینا تامارزی،خصیل،سونبوللر
نه گول آچدی،نه سس وئردی بولبوللر


«تدین» دولانیر یار،قازی_قازی
باشیندا چال پاپاق الینده سازی
سؤیله هر باهارین وار بیر گودازی
سویوشور گونوموز،دولانیر ایللر
نه گول آچدی نه سس وئردی بولبوللر

تدین