سهند اولادی ( فرزند دیار سهند) | سه شنبه ۲۳ مرداد ۱۴۰۳ | 1 PM
📜فالچیام مخصوص سن +18به بالا
کریمی_دن_اوخویاق
📝رحمتلیک کریمی مراغه ای
فالچی قارداش قاپیدا دورما بویور گل ایچری
باجیوین بیر ایکی ساعت سنه وار دردسری
منه آچ بیر کتاب آغزی نظر ائت طالعیمه
دولانیم باشیوه ای جن لرین تاج سری
الیمین یوخ نمکی هر کسه خوشلوق ائدیرم
عوضینده اولورام تیر جفانین سپری
قئینانام، قئینیم، اَریم دوشمن اولوبلار هامیسی
بالدیزیم خشک اولا قویمور گؤزومون اشک تری
بیرده دؤرد ایلدی گلین گلمیشم اولمور اوشاغیم
چوخ دوالر یئمیشم اولماییب آمما ثمری
فالچی بیر مشتریانه خانما سالدی نظر
اکمه ییب مثلنی گوردو بو جهانین پدری
آغزی فندق، دوداغی پسته، یوزی قرمزی گول
چکه بیلمز بئله بیر نقشه نی چین نقشه گری
حلقه ی زولفده بیر خالی اولوب نقطه ی نون
پرتو رویی سالیب حیرته قرص قمری
شوخ دوروب سینه ده بیر جوت م... مثل انار
مست ائدیر نرگس شهلالری صاحب نظری
دئدی آدین دئدی قارداش کنیزین ماه زرم
آتامین آدی محمد آنامین آدی زری
اَیلَشیب آچدی کتابین ائدیب اوراقه نظر
یوزونه قویدو الین فکره گئدوب بیر قدری
خانیمین عشقی ائدیب طاقتینی زیر و زبر
گوردو مشکل گؤزو درک ائیلیه زیروزبری
نه خانیم کیپریگی اوخ قاشلاری مانند کمان
صید ائدر گونده اوتوز دل کسه گر رهگذری
آغ بلوز قرمزی دامن ساری لیفلیک قره خوت
باشدا فر، قولدا قیزیل ساعتی، نایلون کمری
چکدی بیر آه باشین قووزادی باخدی خانیما
یازیغین مزرعه ی صبرینه سالدی شرری
دئدی ای وای نه گؤرورسن دئ گؤرورم فالچی داداش
سنی تاری باشیمین وار نه قضا و قدری
دئدی جادو ائلییب لر سنه بیچاره باجی
سمّ قاتل اولی سن هر کسه وئرسن شکری
بیر کوله بوی، ساری توک واردی کمینینده سنین
اودو برپا ائلیین آی باجی بو فتنه لری
بیر زبان بند دعاسی یازارام قئیناناوا
بیرده بیر یاخشی محبت دعاسی مختصری
قینوین بالدیزیوین باغلارام آغزین دیلینی
قویمارام بیر نفر اولسون سنه بو ائوده جری
گؤبه يين دؤوره سينه بير طلسم وار یازارام
چوخ مجرّبدی وار اولاد اوچون آرتیق اثری
سیه پونزا ساری موم بیرده اوچ آرشین همایون
یئددی رنگ ساپ ایله من رفع ائدرم بو کدری
یازمارام اؤزگویه آمما سنه خاطیر یازارام
جن لردن بو دعانین منه چوخدو خطری
خرجی چوخدور ولی سندن آلارام اللی تومن
زعفرانیله گرک قاطی ائدم مشگ تری
آلدی بو سوزلر الیندن خانیمین صبر و قرار
دئدی واللاهی بودور باطل ائدن سحرلری
دوردو یخدانی آچیب تئز چیخادیب بیر بالا کیف
او کیف آرتیردی همان فالچیا نور بصری
دئدی بو پوللاری قارداش کیشیدن جازلامیشام
ساتمیشام یاغ دوگی، قند چای، اَریمین یوخ خبری
سنده بیر نحو ائله گلسین اله اللاه رضاسی
راحت ائلیه بو بلادن منِ خونین جگری
برکیدیب پوللاری قوینوندا او ابلیس زمان
دئدی س... باباوین اَنگینه بیل مختصری
چیخادیب بیر طبقه کاغذ ائدیب جیزما قره
دئدی آرتیخدی قیلیجدان بو دعانین کسری
خانمین وقتی او وقت اولدو یازیلسین گؤبه یی
قووزاییب دامنینی شوقیله اول شوخ پری
ایستدی فالچی دواته یئتیره سر قلمی
قعله نین اوسته وورا پرچم فتح و ظفری
میرزانی قویمادی مقصوده یئته دست قضا
قاپیدان فورا او ساعت خانیمین گیردی اَری
فالچی نین پیسرینه سالدی بئش آلتی شاپالاق
قیشقیریب آی گلین اؤلدوردوله میرزا صفری
فالچی قورتولدو قاچیب نوبه یئتیشدی خانیما
او محبت دعاسی یاخشی باغیشلیر اثری
ال آتیب توکلرینه چکدی اوتاقدان ائشییه
ساوریلیب جوجه کیمی هر طرفه موی سری
گلدی همسایه لر آخرده تماشایه تمام
کوچیه سس دوشوب اؤلدوردو اَری ماه زری
ووردو آنجاق خانیما نه یئمیسن تورشولو آش
اَزیلیب قول قیچی قوش تک داغیلیب بال و پری
اؤلوسون آلدیلار القصه الیندن کیشینین
آند ایچیب ساخلامارام من داخی بو بد گهری
عمری صرف ائتدی کریمی دئمه لهو و لعبه
بیر نصیحتدی اگر لطفیله قیلسان نظری
بعضی مردان خطا دیده و عیار و شرور
دولانیر فالچی لباسینده گزیر کوچه لری
آللادیر بیناوا عورت لری مین حیله ایله
چکیری هم کئفینی هم جمع ائدیر سیم و زری
اویان ایرانلی خانیم یوخلاماق ایامی دییل
خلقین آفاقی دوتوب شهرت فضل و هنری
گون چیخیب دیر هله سن تازه دوشوبسن یوخویا
سنی بیدار ائلمز بانگ خروس سحری
عورته اؤز دیلیدیر عمده محبت دعاسی
دیلینن رام ائدر انسان اؤزونه شير نری
اوّل اخلاقیوی اصلاح ائله ساشما گلنی
دیلینن وورماگلن هر دیله بیر نیشتری
خوش دیلین اولسا تمام عیب لرین گوزدن ایتر
دیلدی محبوب ائلیین خلقین ایچینده بشری
باغلا قرآنین اؤزون ساغ سولا يوخ فايده سی
بقره سوره سی انسان ائلییَنمز بَقَری
@qazvinturklari
استادکریمی‌مراغه‌ای