⭕️ #شب‌چله_چله‌قارپزی
🔰 #استادکریمی‌مراغه‌ای
✍بند 1
شب چِلّه‌ن مبارک اولسون خانیم
پچاخلا قارپیزی گوزل جیرانیم
بِحمدلله بهشت اولوب ایرانیم
باشووا ایستورم دوروم فیرلانیم
یاشاسین ایرانیم آذربایجانیم
✍بند2
نه قِسط وام غمی نه چَک نه سفته
چورک سولاخلی ، هم قازاندا کُفته
اَجلدن آلمیشام قَباله مُفته
بیر دردیمه واردی اوتور درمانیم
یاشاسین ایرانیم آذربایجانیم
✍بند3
شب چلّه گرامیدی مُحترم
بیر ساعتین ایکی آیا وئرمرم
صبح آچیلینجا گُل اَکم گُل دَرم
وطنیم گلشنیم باغیم بُستانیم
یاشاسین ایرانیم آذربایجانیم
✍بند4
کورونا شاللاغین آلوبدی اله
سالوبدی کُلّ عالمه ولوله
باهالیق ایرانه سالوب زلزله
قیچیما سازش ایلمور یورقانین
یاشاسین ایرانیم آذربایجانیم
✍بند5
باها بازاردان آلمیشام قارپیزی
ایشیگی سبزدی ، ایچی قرمیزی
باتیر جانا باهالیقین بورنیزی
منه نه ربطی ، وار منیم امکانیم
یاشاسین ایرانیم آذربایجانیم
✍بند6
بیر عدّه دویمیوب اوماج آشیندان
بیر عدّه‌نین دولار یاغیر باشیندان
بیر عدّه لحظه اَنموری ماشیندان
اوزاق گئتمه یورولاسان مامانیم
یاشاسین ایرانیم آذربایجانیم
✍بند7
بیر عدّه‌یه ئولومدی زندگانلیق
نه جیبده پول نه سفره‌ده یاوانلیق
گون اورتاسی اوباشداندان قارانلیق
ئولیم ایستور یازیق گئدیب توانیم
یاشاسین ایرانیم آذربایجانیم
✍بند8
بیر عدّه‌یه شب چلّه کَدردی
دابانین چَک ، بویون اوخشا هَدردی
طاقی ئولمیش سارالمیش گُلبَسردی
اوتور یاتیم ایسته‌میرم اویانیم
یاشاسین ایرانیم آذربایجانیم
✍بند9
بیر عدّه باخماقدان یوموبدی گوزین
کورا، نه فرقی وار گئجه گونوزین
بیر عدّه کئفلیدی ایتیریب اوزین
خوشدی یاتیم ایسته‌مورم اویانیم
یاشاسین ایرانیم آذربایجانیم
✍بند10
بوش اولماسین وطنیمین بوجاقی
قِینه‌سین قازانی یانسین اوجاقی
ایگیت‌لر بَسله‌سین ایستی قوجاقی
باخیم فَرحلنوم گَزیم دولانیم
یاشاسین ایرانیم آذربایجانیم
✍بند11
چلّه گئجه‌سیدی یوزوز آغ اولسون
هامی‌لیقدا داماقوویز چاغ اولسون
وطنیمیز بُستان اولسون باغ اولسون
باشیمیزا کُولگه سالسین قرآنیم
یاشاسین ایرانیم آذربایجانیم
✍بند12
نامحرمین گوجی چاتماز ایرانا
ایرانیمیز وابسته‌دی قرآنا
چنگ توسّل وورمیشوخ ایمانا
ولایت سایه‌سینده دالدالانیم
یاشاسین ایرانیم آذربایجانیم
✍بند13
(کریمی‌ام) شاعرلرین قوجاسی
اوزون عومور نه آلچاقی اوجاسی
مَحبّتدی کرامتین باجاسی
غفلت یوخوسیندان گرک اویانیم
یاشاسین ایرانیم آذربایجانیم
دوسدان دده چیخماز بالا یاددان داداش اولماز
ئوز فکریوه قال قونشویا گوز تیکسن آش اولماز
دنیا بیر اویونجاقدی اویون اوینیانیندی طویدا گوزلیم
اوینامیینجا شاباش اولماز حوّا داریا هاجر اِشه تولیا سارا زهرا توخویا
کیرلی قیزیلدن قماش اولماز
موسی اَلیوب دارتا، خمیر ایلیه عیسی مریم یاپا
قاره داریدان آغ لواش اولماز
نقّاش طبیعت قلمیندندی گوزللیک
هی میلچینی سوخ وَسمیه چک چاتماقاش اولماز
دنیا دگیشیلسه آدیلان مود دگیشیلمز
الگوج قلج اولماز هم اوراخ خودتراش اولماز
دنیاوه هم عقباوه جوانلیقدا تلاش ائت
دای سِنّ گئچندن صورا سنده تلاش اولماز
هر جنگ و جدل جهل و عناد اوسته‌دی دائم
انصاف و مروّت اولان ائوده ساواش اولماز
ساغلیقدا منیم قدریمی بیل مرحمت ایله
مندن صورا گل قبریمه قیرتک سوواش اولماز
تهمت زده یولدان حذر ائت گئچمه آماندی
فکر ایلمه چایدان گئچه نین اوستی یاش اولماز
بیر باش که اگیلدی گلَنین باشماقین ئوپدی
توپ قوی آدینی بیر ائله باشدان که باش اولماز
داش دوشدی دئسم باشیمیزه هئچ کس اینانماز
دیوانه دیللر منه چون گویده داش اولماز
ئوز آتدیقیمیز داشلاریمیز باشلاریمیزدان
دگدی ائله برک دگدی دییرسن یاواش اولماز
گئت امر معاشونده تلاش ایله #کریمی
بوک دفتری یوز بیت غزل بیر لواش اولماز ✍