منیم بالام بو دؤنیایلا اویناما
.سن جاوانسان دؤنیا قوجا دؤنیا دی
,دؤشمن نه دیر ؟ دوست اوینی دوست ییخار
...بیلن بیلیر دؤنیا نئجه دونیادی
عمره گؤنه اعتیبار یوخ ازلدن
بیر ده دؤنؤب یارپاق اولماز خزلدن
بئشئیندن بیزه تابوت دؤزلدن
بَه لَه یین دن کفن تیکان دونیادی
کیم نه آنلار بو ظالیم ین ایشیندن
چوخ لارینی کچیدیبدی دیشیندن
محکم یاپیش پاپاقینین باشیندان
باشدان پاپاق آلیب قاچان دؤنیادیر
قارا پالتارلی قادین
کیشی لر بیر اولمور
آتام بالاسی
قورخاغی وار، ایییدی وار
آمما هر کیشی‌نین اؤلندن سونرا
قبرینین اوستونده آغلایاسی
بیر قارا پالتارلی گؤزل قادینا
اومیدی وار.
سن اؤلنده
کیم اولاجاق گؤزلرینی باغلایان؟!
قارداشمی اولاجاق؟
یادمی اولاجاق؟
بو دونیادا بلکه سنه ان چوخ آغلایان
ان چوخ آغلاتدیغین قادین اولاجاق.
گؤز یاشلاری یودوقجا باش داشینی
قبرینده قونجالانیب
دئیه‌جکسن ایلاهی،
ایللر بویو آغلاتدیغیم بو قادین
گؤرن نئجه ساخلاییب
بو قدر گؤز یاشینی؟!
بیرجه کره
نه ساچینی اوخشامیشام
نه گؤزونو سیلمیشم.
گؤزلریمه باتیر ایندی ساچلارینین هر دنی
ایللر بویو بو قادینا
من آخی درد وئرمیشم،
ایندی گؤرن نییه چکیر دردیمی؟!
بو قادین
باش داشیمی
اؤپوب سیغاللاماقدان‌سا
یومروغویلا دؤیسه،
دؤیسه یاخشیدیر.
قبریمین اوستونده آغلاماقدان‌سا
منی سؤیسه یاخشیدیر.
یئری، یئری قارا پالتارلی قادین
کیری، کیری قارا پالتارلی قادین
بو قبیر‌ده مین قبیردن بیریدی.
باش داشیمی بسدی باسدین باغرینا
بوتون منه آغلایانلار کیریدی.
سن‌ده کیری
قبریم دامیر
آغلاما..
یوز يول آه چک، درد آزالماز
بیر درد یوز آهدان بؤیوکدور
بير گئجه‌نین قارانلیغی
یوز-یوز چيراقدان بؤیوکدور
كيم ياراتدی بيزى يوخدان؟!
ايندى باخسين بير قیراقدان
دونيادا، تاماە تاماهدان
گو‌ناە گوناهدان بؤیوکدور
باشیمیزدا قاپاز وارسا
یاشاماغا قفس وارسا
بیر قو‌روجا نفس وارسا
"وار"، يئنه "یوْخ"دان بؤیوکدور
مين ايللردير اؤله-اؤله
اؤلوم نه‌دیر بیله-بیله
دوغولورسا اينسان ھله،
اینسان آللاهدان بؤیوکدور...
#رامیز_رؤوشن
@qanadli_duyqular
هر عؤمور روماندی؛ اوزون یا قیسا،
شیرین سئوگی‌لری، آجی سهولری.
سنین یاشادیغین بو رومانین‌سا،
نه چوخدو جیریلان صحیفه‌لری.
بوردا اوج-اوجادی دوغرویلا-یالان،
بلکه، بو رومانی یازان ناشی‌دی؟
بو آغ واراق‌لاردا لکه‌سی قالان،
یا دوداق بویاسی، یا گؤز یاشی‌دی.
چوخ‌دا واراق‌لا‌ما بو رومانی سن،
غفلت‌دن سکسنمک تهلوکه‌سی وار.
هانسی واراق‌داسا بیر ده گؤرَرسن،
هله قورومایان قان لکه‌سی وار.
بو کیمین قانیدی؟ بو نه قاندی؟ نه؟!
کیمین قاتیلی‌سن؟ کیمین جللادی؟
باتیر بارماغینی، بیر وور دیلینه،
گؤر تانیش گلیرمی بو قانین دادی.
دادی یوخ، تامی یوخ، بو نئجه قاندی؟
هاردان بو واراغا سیزیلیب بو قان !؟...
بیر یوخ؛ سنین عؤمرون ایکی روماندی؛
بیری تانری یازان، بیری سن یازان.
تانری‌نین یازدیغی بو دئییلدی‌کی...
بیر دؤن عؤمرونه باخ اوتوز ایلدی‌کی،
تانری‌نین یازدیغی او رومانی سن،
کورلایا-کورلایا عؤمور سورورسن.
بیر باخ او سهولره ، یالنیش‌لیق‌لارا،
گؤر نئجه جالانیب بیری-بیرینه.
نئچه دوستلوق‌لارا-تانیش‌لیق‌لارا،
سن نؤقطه قویموسان ویرگول یئرینه.
گؤر نئجه قوشموسان سن بو روماندا،
دوغما فئیعل‌لری یاد ایسیم‌لره.
بؤیوک سئوگی‌لرین کئچیب یانیندان،
اویموسان یالانچی تبصوم‌لره.
...نه دئییر اوزاق‌دا سسله‌نن آذان؟
دئییر، ایندن بئله بو دیلک نه‌دی؟
ایستر تانری یازان، ایستر سن یازان،
هر ایکی رومانین سونو ائوین‌دی.
آمما سونا گئدن یول‌لاری باشقا،
اؤلنده تانری‌یا اوزونو توت دئ.
ائی بؤیوک رومانچی منی باغیشلا...
#رامیز_رؤشن
@qanadli_duyqular