سهند اولادی ( فرزند دیار سهند) | یکشنبه ۶ فروردین ۱۴۰۲ | 4 AM
🌿🍂🌺🌿🍂🌺🌿🍂🌺🌿🍂🌺
بایرام دیر عاشیق چال گنه دوران تزه لنسین
گیدسین بوکدر بلکه بو انسان تزه لنسین .
.......
روح لار چوروین یئردی جانیم، بیر هاوا کوکله
چوکسون جانیما روح پریشان تزه لنسین.
.........
چال باش ساری تیل، مصری، او بابک قالاسیندان
گولسون ساوالان گردنه حیران تزه لنسین
.............
کونلوم گنه ده بیر (گیله نار) ۲ ماهنیسی ایستیر
ذیل پرده ده چال، قوی شکی شیروان ۳ تزه لنسین
.......
پرگاری دولاندیر باکی دان قافقازا ساری
قوی جوشسون آراز نقشه ی توران تزه لنسین
.......
گوللر بوغولان یئردی گولوم ئورتمه گول اوستون
سر تیللرینی کوچه خیابان تزه لنسین
..........
فکرایلمه سن بیربیله شیطانلار ایچینده
دای بیرده بیزیم محو اولان ایمان تزه لنسین ..
......
بیرباغ کی سوسوزدان صولا هرگون دولا اوغرو
واجب دی نگهبانیله ، باغبان تزه لنسین
............
کیم لردی گورون قیزلاری مسموم ایلئین لر
قویمور گنه ده بوگل ریحان تزه لنسین
.............
قورخوتماگیلان بو آچیلان گوللری واعظ
قوی بیر بیر آچیلسین بوگلستان تزه لنسین
...........
آزاد یاشاسین پاک سارالار مدرسه لرده
هئی تیللی کیمین غیرت نسوان تزه لنسین
.......
قرآنی کی سن ناسخ منسوخ بیلیرسن
منسوخ ایله قوی کهنه مسلمان تزه لنسین
........
بووضعیله اصلن بیزیم ایران آباد اولماز
بیر یئرلی گرک دولت کیهان تزه لنسین
.......
چوخ باخما قاباقدان باشا گیر ویرمه حجابه
لازم دی آیاقدان باشا ایران تزه لنسین
.......
ملت یاشاییش ایستیری دنیا سایاقیندا
راضی دووور اصلن گنه بهران تزه لنسین
.............
آزاد ایله زنداندان داکی اصلان لاری ایندی
بایرام دی بیر آز معنی رحمان تزه لنسین
احمدصادقی
@turkimahn
احمدصادقی