اول کی یاراتدی یئر اوزون خالق سبحان
هم غم یارانوب ، همده محبت ، همی جانان
هم عاشیقی خلق ایلیوب هم معشوقی رحمان
بیر عده فقط خوش یاشیوب ، چوخلار اوتوب قان
بیرعومر چکیب منت گول ، بلبل شیدا
پروانه ده شمعین اودونا یاندی سراپا
آواره دوشوب چوللره کام آلمادی مجنون
معشوقینه جانین وئریب اول عاشیق دلخون
بیرعده ده عاشیق ، جمع اولوبدور بو جهاندا
چاتماز اولارا آیری بیر عاشیق بو زاماندا
بو عده نین عشقی ، هدفی وار یوخی داغدی
روحی ، شرفی ، لذتینین آز چوخی داغدی
بیر یئردی بوداغلار کی اونون چوخدی صفاسی
دیل لرده گزر داغچی لارین مهر و وفاسی
داغدان وئریلیب احمده دستور رسالت
موسی دا ائلردی بو مکان اوسته عبادت
کهف اصحابینی ساخلادی داغ اوز قوجاغیندا
داغدان چوخ ایگیت لر دایانوب زور قاباقیندا
چوخ آدلیم ایگیت لر کی بو یئردن آدی چیخدی
بابک داغی سنگر ائله دی دشمنی یخدی
بیر یئردی بو یئر هرکس اونا داخل اولانماز
هر کیمسه گلوب اوزآدینی داغچی قویانماز
چوخ شرط لر ایستیر ،کی اولا داغچی بیر انسان
دارلیقدا ایگیت داغچی اوزون ائتمز هراسان
دنیانی دولان داغچیلارین مثلی تاپیلماز
غیرتلی اولار داغچی اونا لکه یاخیلماز
کیم اوز جانینی درده سالار یولداشا خاطیر
کیم شاختادا چولرده قالار قارداشا خاطیر
الجک لرینی تحفه وئریر یولداشا چولده
بارماقلارینی شاختا ویریر هر ایکی الده
بهمن آپاریر یولداشی بو ائوده دایانمیر
حاضیر دی اوله یولداشینی چولده قویانمیر
هر بیر زادینی جمعین ایچینده بوله جاقدیر
گر لازم اولا یولداش ایچون جان وئره جاقدیر
پس بونلارا خاطیر هر آدام داغچی اولانماز
بو شرط لر اوستونده هر انسان دایا نانماز
باخما اوزونی داغچیلارا بنده قاتیبدی
چون درس وفادارلیقی اونلاردان آلیبدی
عکس طبیعت زیبای زرنج مراغه
