💢💢💢
#یوردوم
ایسترم قیساجا تعریف ائیله‌یم
شؤهرتین یاییلیب هر یانا یوردوم
من سنین اوغلونام سن منیم آنام
آنانی دگیشمم جهانا یوردوم
شؤهرتین اوجالیب توتوب هر یانی
سولارین یئتیریر در مرجانی
داغلارین داشلارین زبرجد کانی
دۆزگنلرین بنزر رضوانا یوردوم
شیرین سولارین وار کیمیا توپراغین
یئر آلتی قیناقلار دالدا بوجاغین
ایستی‌دیر سویوماز قیزغین اوجاغین
اود وورار خایینا، دوشمانا یوردوم
خلقلر ایچینده اوجادیر باشین
پارلاق اولدوزلارین باتماز گونشین
کوْل آلتدا کۆکره‌ییر سؤنمز آتشین
شعله چکیب قالخار آسمانا یوردوم
تاریخدن سیلینمز، گئتمز آدیم وار
هئچ اسگیکین یوخدور هر بیر زادین وار
چوخ کامل بیر دیلین، آغیز دادین وار
دیل عاجیزدیر چکسین بیانا یوردوم
قوینوندا بسلنیب چوخ قهرمانلار
طوفان سارسیتمایان قورخماز اوغلانلار
گوجلو قوللار ایله ارکک اسلانلار
هایقیریب گیرنده میدانا یوردوم
تاریخلر ثبت ائدیب افتخارلارین
باقرخان، ستارخان، شهریارلارین
دونیا بویو قالان یادیگارلارین
نه حسابا گلیر نه سانا یوردوم
اۆستۆن شاعرلرین سؤزلری آشکار
وزن-قافیه ده، معنادا پربار
ایتمز اثرلری قالار پایدار
اومودوم وار حقّه قورآنا یوردوم
آدلیم اوزانلارین خوش آوازلاری
گؤزل بارماقلاری چالیر سازلاری
گؤللرده یایخانیر قوبا قازلاری
قایالار سئوینیر ترلانا یوردوم
دده قورقوت آدی دیللرده ازبر
واحد، فضولی‌لر، آشیق علعسگر
سؤزه دؤزوم وئرن دوللو آباذر
صحبتی روح وئریر انسانا یوردوم
خسته قاسم نباتی‌دن یاد اولسون
قول‌هارتون دا اؤز دینینده شاد اولسون
بالوولو مسکیندن خوشجا آد اولسون
دوغرو یول آچیبلار عورفانا یوردوم
دوللو مصطفی‌نین چکک آدینی
عرفان مکتبی‌نین قول قانادینی
بالدان شیرین سؤزلرینین دادینی
ابسم الله او شهد شانا یوردوم
چاغداش شاعرلرین همت ائتسینلر
آتا-بابالارین یولون گئتسینلر
سؤز خنجرین ووروب دشمن دیدسینلر
گۆرۆلتۆ سالسینلار دؤرد یانا یوردوم
دوشمنه آلدانماز تورک‌لرین سویو
بوکولسون خاینین قامتی، بویو
چوخلارینین آخیر آزینین سویو
گؤز قویوبلار آذربایجانا یوردوم
آذربایجان دوغرولوغو بگَنر
یوردون سئور اولوسونا گۆوَ‌نر
بیری ساغا بیری سولار سئوینر
من ده فخر ائیلرم عورفانا یوردوم
یۆزلر درده درمان دوزلو گؤللرین
درین دره‌لرین گئنیش چؤللرین
دوغرولوق سمتینه آچیق یوللارین
شانلی آذربایجان، ای آنا یوردوم
سنین اسگی آدین آتیرپاتان‌دیر
سونرا آذربایگان، آذربایجان‌دیر
هر اوچو معنادا اود قورویان‌دیر
آتشی یاندیردیم جهانا یوردوم
میوه‌لی باغچالار، گؤزل باغلارین
یاشیل یایلاق‌لارین، اوجا داغلارین
جانسیزی دیریلدیر باهار چاغلارین
دردلری چاتدیریر درمانا یوردوم
بابک تک ار ییخان بایندیرخان‌لار
اوردولار داغیدان، آلای پوزانلار
نبی ایله کرم تک قوچاق اوغلانلار
قالیق آد قویوبلار جهانا یوردوم
قورخماز ایگیدلریم مرد مردانا
اون ایگیده برابردیر بیر دانا
هایقیریب گیرنده هردن میدانا
بنزه‌ییر بیر قیزمیش قاپلانا یوردوم
قناری‌لر اوچا قونار چمنه
قومرولار ذوق ائدر سونبول سمنه
بولبول گۆله عاشیق من ده وطنه
شور-غوغا سالارم گۆلشانا یوردوم
دده کاتیب حقّی دئیر دایانماز
یوردو سئور اؤلنه تک اوسانماز
ابراهیم عاشیقی آتشه یانماز
بیر قوچام گلمیشم قوربانا یوردوم.
✍#دده_کاتیب
#ایمگه‌لر_کانالی
✔️✔️✔️
👇👇👇
https://telegram.me/imgalar