عرفه یا عارافا و بایرام دبلری یئکانات دا
@yekanoghlu
قدیم ایللردن بری عرفه گونو بایراما بیر گون قالمیش هامی قبیر اوسته گئدیب اؤز دونیادان کؤچوموشلری-نین مزاری اوسته فاتحه و قرآن اوخوب زیارت ائدرمیشلر.
قبیر داشلارین یویوب تمیز له یندن سونرا حالوا و یا باشقا یئمیشلر نذر وئریلردی.
بو رسم بیزیم کندیمیز داش یئکنده ده یئرینه گتیریلردیر. من اوشاغیدیم عارافا گونو ناهاردان سونرا آنام پیشیردیی بایرام حالواسی ایله چوخلو چوره ک و پئندیر سوفرایا بوکوب دده م ،عمیلریم و عموغلانلارلا بیرلیکده قبر اوستونه ساری یولا دوشه ردیک، بوتون آییله میزه مربوط اولان اؤلنلریمیزی بیر-بیر تاپیب فاتحه و قرآن اوخویاردیق، سونرا یولون اوست الینده(ایندیکی گئجه گوندوزلو نوری مدرسه سینین یئری) هر طایفا معلوم اولونموش اؤز یئرلرینده یئغیلیب جمع اولاردیلار، بیلدیییمه گوره دورد یا بئش طایفانین اهلی آشاغی قبرستانلیغیندا و باشقا طایفالار ایسه یوخاری اسکی قبریستانلیغیندا جمع اولارمیش، بو توپلانتیدا کندین ماللاسی ایل دوعاسی و گله جک گونلرین خییر،برکت و بوللوق اولما دوعاسین سؤیلویوب، اؤلنلریمیزه تانری دان رحمت ایسته ردی.
سون ایللرده کندین روحانی سی طرفیندن دئدیگیمیز خییر-دوعالار وئریلردی. سیدلره، یوخسوللارا پول یئغماق و جماعت آپاردیغی یئمکلردن بیر چوخلو مقدار چوره ک ده یوخسول آییله لر آراسیندا پایلاشماق بوگونون گوزل دبلریندن ساییلیردیر.
اهالی سفره لری آچیب حالوا چوره ک و ساییر یئمکلرله بیر-بیرلری ایله دوستلوقدا و محبت تیکه سی کسردیرلر.
مراسیم بیتندن سونرا جماعت گوله-گوله ائولرینه دوغرو قاییدیب، ایلین تحویل اولماسین اؤزلردیلر.
تمام ائولردن سئوینج ، گولوش و آشیقلارین ساز صداسی اوخونان کاسِتلردن و گرامافون صحیفه لریندن قولاقلارا ده یَردی. اوشاقلارین سئوینجلری آرتیب کوچلرده جویز ،بادام ،آشیق و یومورتا اویونلاری ایله دوموکله نردیرلر.
آل الوان بزکلی خونچالار گلین قیزلار اوچون پایلار گوندریلردی. حیطلر و ائولرین قاباغی حاصاردان ایشییه دک سو سپیب سوپورلنردی بیر حالدا کی تورپاغین گوزل قوخوسو بئیینلره دولاردی اوره کلر صاف دویغولار جانلاناردی.
بویودور کندیمیزین و یئکانات منطقه سینین عارافا و بایرام گونلری دبلریندن قیسا تانیتیم.
هامیزا جانساغلیغی اوزون عومور آرزوسو ایله
باهار بایرامینیز موبارک
زینالعابدین همتی(یئکن اوغلو) 94/12/29
@yekanoghlu
یئکن اوغلو کانالینا قوشولون👆👆👇👇
سس فایلی 👇👇👇👇