....نه دردی وار....

بیلمیریم کؤنلومون نه دردی واردیر؟!
سیغینیب سینه ده یاسه باتیبدیر
یتیم اوشاق کیمی بوینونو بوکوب
غریب بولبول کیمی قیشا چاتیبدیر

آخیدیر گؤزومدن یاشی دالبادال .
گولمز اوزوم گونلر آیلار سال-با-سال.
ندیر باشیمداکی بو حال بو احوال؟
یامان چاغدا منی قاله قاتیبدیر


نه دینیر دیندیریم نه دیلدن آنلار
اینانمیر قوجالدیم گئچدی زامانلار
من اونو دانلارام او منی دانلار
قانمیر کی قاندیرام گونوم باتیبدیر


کاتيب اوغلو عومور اللینی گئچدی
تای توشلارین اجل باده سین ایچدی
فلک سنین بویان آغ دونو بیچدی
منیم غافیل کؤنلوم هله یاتیبدير

✍کاتب_اوغلو

@turkanadili
🍃🌹🍃🌹🍃

بایرام گلیر



گول غنچاسی گولوب دئدی موشتولوق
باهار گلیر چوللر گولور سنده گول
قیزیل لاله زینت وئریر هر یانا
باغدا آچان گوللر گولور سنده گول

ژاله قونوب قیزیل گوله سونبوله
بنووشه لر بویون أییر بولبوله
گوزل کهلیک داغا سالیب ولوله
یاغمور یاغیر سئللر گولور سنده گول


باغچالاردان مئیوه گلیر بار گلیر
تاخچالاردان غوبار سیلین یار گلیر
سئوینجیدن دونیا منه دار گلیر
قالخ آیاقا ائللر گولور سنده گول

کاتب اوغلو بایرام گلیر یاز گلیر
بولبول نغمه اوخور خوش آواز گلیر
باشدا پاپاق آشیق الده ساز گلیر
تورکی اوخور دیللر گولور سنده گول

کاتب

@turkimahn

انسان اوغلو دونیا عیبرت ائویدی.

گوزو آچیق عیبرت آلان اولسادا .

دونیایه آلدانیب اویونجاق اولماز .

حق سوزو ائشیدیب قانان اولسادا.

دونیا بیر میداندی چالیش آد قازان .

خلقه خدمت ائیله تا کی وار زامان .

اجل بیر کیمسه یه هچ وئرمز امان .

هر یئرده گیزله نیب پنهان اولسادا .

آللاه یارادیبدی قولا قول اولما .

هوس آتشینده یانیب کول اولما .

اینجیتمه کیمسه نی آجی دیل اولما.

باغلانار دیللر خوش بیان اولسادا.

کاتب اوغلو ائشید حققین نغمه سین.

بیر اینسان کی ائلین قدرین بیلمه سین.

عالیم کی علمینه زکات وئرمه سین.

لعنته لایقدی لقمان اولسادا .

@bayatilar

.............قالسین....

کاتب اوغلو:

.............قالسین....

کونول گوزی یاشلی مظلومون آهی .

محشر گونی اوجا دیوانا قالسین .

گولدن آیری قالان قفس ایچینده.

بولبولون ناله سی گولشانا قالسین.

حرام مالدان باشا گئدن سارایلار.

ظالیملر اوتوران ائولر یووالار.

ظولمه دایاخ دوران داشدان قالالار.

ییخیلسین دیواری ویرانا قالسین.

یوخسولون فریادی یئتیم دوعاسی.

درمانسیز خسته نین گئلن شفاسی.

اولادین آجیسی قارداش یاراسی.

ایوب صبری وئره ن رحمانا قالسین.

کاتب اوغلو داد بو کوتو زاماندان.

ایمانسیزدان بهتان دییئن زباندان.

گوناهکار قوجادان هرزه جواندان.

شیکایتیم آخر زامانا قالسین.

( کاتب اوغلو)
@ElimDilim ❤️🌺❤️